التقت «بوابة الجريمة» والدة الشهيدة نجلاء نعمة الله، المعروفة إعلاميًا باسم «شهيدة غدر الصحاب»، أو «فتاة المول» أو «فتاة كفر الدوار» أو «ضحية غدر الأصحاب»، وتحكي الأم المكلومة في الفيديو عن «نورهان» صديقة ابنتها والتي تم توجيه الاتهام لها بالقتل بالاشتراك مع أحد أقاربها وصديقه في مول تجاري بمدينة كفر الدوار في محافظة البحيرة.
في منزل الشهيدة نجلاء نعمة الله كانت هناك صورة بوستر للشهيدة وتم لصق عليها ورقة مكتوب عليها «شهيدة الغدر نطالب بإعدام القتلة» تم وضعها على الحائط، وكثيرًا ما كانت تأخذها الأم المكلومة وتضعها في حضنها.
تقول والدة ضحية الغدر، على علاقة نورهان ونجلاء: «كانت صاحبتها الروح بالروح وكلت عيش وملح عندنا وأبوها أكل عيش وملح كمان عندنا، ونجلاء كانت بتحب نورهان بجنون، وهي كمان كانت بتحبها بس مكناش نعرف إنها بتحبها حب غدر، وغدرت بيها، ونجلاء كانت بتخليها تقعد مكانها في الشغل لحد ما تخلص كليتها، مش هنرتاح إلا لما ييجي حق نجلاء».
وتضيف والدة ضحية غدر الأصدقاء في البحيرة: «نورهان شافت المكتب بتاع بنتي في الشغل غارت منها، وشافت الناس بيحبوها إزاي، وتقول إشمعنى أنا ما حدش بيحبني كده زي نجلاء، وفضلت مستنية لحد ما نجلاء خلصت امتحانات وهتستلم شغلها تاني، غيرانة منها، كانت مدبرة لها خطة مع قريبها وصحبه، ونجلاء يا عيني على نيتها غلبانة».
وتؤكد والدة نجلاء: «كانت بتعمل أعمال خيرية وبتعمل خير لكل الناس ووشها أبيض، ووشها بشوش، الوش البشوش الحلو ده حد يصدق إن دي تنقتل من أعز صديقة لها، حد يصدق القتل البشع ده؟!».
وتقول عن المتهمة نورهان: «خانتها وقتلتها عشان تقعد مطرحها، وتاخد مكانها في الشغل بتاعها، ولو كانت طلبت منها تسيب لها الشغل بتاعها والله كانت سابته وأنا عارفة قلب بنتي، وغدرت بيها، أنا انصدمت فيها، انصدمت لما قالوا لي إنها اللي قتلت نجلاء، ماطمرش فيها العيش والملح اللي أكلته في بيتي من إيدي وإيد بنتي، حسبي الله ونعم الوكيل فيكي إنتي واللي معاكي».
وتقول والدة نجلاء عن جريمة مقتل فتاة كفر الدوار: «أطلب القصاص العادل، وأكون موجودة وهما بيعدموهم التلاتة، أطالب النائب العام والصحفيين والمحامين يجيبوا لي حق نجلاء، المجرمين لو ما أخدوش إعدام كل يوم هيكون فيه قتل، المجرمين لازم ياخدوا عقابهم، وعشان بنتي ترتاح في تربتها، وعشان بالي وقلبي يرتاحوا».
وأبلغ الأهالي في مدينة كفر الدوار بوقوع جريمة قتل لفتاة تدعى نجلاء نعمة الله بدوي وتعمل سكرتيرة لدى طبيب عيون في المول التجاري في مدينة كفر الدوار، وألقت أجهزة الأمن القبض على 3 متهمين وهم صديقة المجني عليها وأحد أقاربها وصديقه، وتبين سرقة مبلغ مالي ومصوغات المجني عليها.
تولت نيابة بندر كفر الدوار في محافظة البحيرة، برئاسة المستشار أحمد عادل رئيس النيابة التحقيقات، تحت إشراف المستشار محمد السعيد عمر، رئيس نيابات دمنهور الكلية، وقرر حبس المتهمون 4 أيام على ذمة التحقيقات بعد الاعتراف بارتكاب الجريمة، والتي كانت كاميرات المراقبة هى بطل كشف جريمة المول.
